ಮಾಘ ಸ್ನಾನ ---- Magha Snana

 

ಮಾಘ ಸ್ನಾನ ---- Magha Snana

 

                              Magha Snana

 

ಪುಷ್ಯ ಮಾಸದ ಹುಣ್ಣಿಮೆಯ ದಿನದಿಂದ ಮಾಘ ಮಾಸದ ಹುಣ್ಣಿಮೆಯವರೆಗೂ ಮಾಡುವಂತಹ ಧಾರ್ಮಿಕ ಆಚರಣೆಯೇ ಮಾಘ ಸ್ನಾನ. ಸರ್ವಶ್ರೇಷ್ಠ ಮಾಸವಾದ ಕಾರ್ತಿಕ ಮಾಸಕ್ಕಿಂತಲೂ ಲಕ್ಷಪಟ್ಟು ಶ್ರೇಷ್ಠವಾದ ಮಾಸವೆಂದರೆ ಮಾಘ ಮಾಸ ಹಾಗೂ ಈ ಮಾಸದಲ್ಲಿ ಮಾಡುವಂತಹ ಪವಿತ್ರ ಸ್ನಾನ. ಇದರ ಮಹತ್ವದ ಕುರಿತಾಗಿ ಮಾಹಿತಿ ಇಲ್ಲಿದೆ ನೋಡಿ.

ಹಿಂದೂ ಧರ್ಮದಲ್ಲಿ ಪ್ರತಿಯೊಂದು ಮಾಸಕ್ಕೂ ಅದರದೇ ಆದ ಪ್ರಾಧಾನ್ಯತೆ ಇದೆ. ಹಿಂದೂ ಸಂವತ್ಸರದಲ್ಲಿ ಬರುವ ಹತ್ತನೇ ಮಾಸವೇ ಪುಷ್ಯ, ಈ ಮಾಸದ ಹುಣ್ಣಿಮೆಯಂದು ಬನದ ಹುಣ್ಣಿಮೆ ಎಂದು ಆಚರಿಸಲಾದರೆ, ಈ ದಿನ ಆರಂಭವಾಗುವ ಇನ್ನೊಂದು ಆಚರಣೆಯೇ ಮಾಘ ಸ್ನಾನ. ಮಾಘ ಸ್ನಾನವೆಂದರೆ ಪವಿತ್ರ ಕ್ಷೇತ್ರಗಳಲ್ಲಿರುವ ಜಲಮೂಲಗಳಲ್ಲಿ ಮಾಡುವ ಪವಿತ್ರ ಸ್ನಾನ.

ದೇವಾದಿ ದೇವತೆಗಳಾದ ಬ್ರಹ್ಮ, ವಿಷ್ಣು, ಮಹೇಶ್ವರ ಹಾಗೂ ಆದಿತ್ಯಾದಿ ದೇವತೆಗಳು ಮಾಘ ಮಾಸದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಪುಣ್ಯ ಸ್ನಾನ ಮಾಡುತ್ತಾರೆ. ಹಾಗಾಗಿ ಈ ತಿಂಗಳಿನಲ್ಲಿ ಮಾಘ ಸ್ನಾನ ಮಾಡಿದರೆ ಪಾಪಕರ್ಮಗಳು ನಿವಾರಣೆಯಾಗುವುದೆಂಬ ನಂಬಿಕೆ ಇದೆ.ಮಾಘಸ್ನಾನವು ಪುಷ್ಯ ಹುಣ್ಣಿಮೆಯಂದು ಆರಂಭವಾಗಿ ಮಾಘ ಹುಣ್ಣಿಮೆಯಂದು ಮುಕ್ತಾಯವಾಗುತ್ತದೆ. ಮಾಘ ಮಾಸದ ವಿಶೇಷತೆಯೆಂದರೆ ಈ ಅವಧಿಯಲ್ಲಿ ಪ್ರತಿಯೊಂದು ಪ್ರಾಕೃತಿಕ ಜಲಮೂಲವೂ ಗಂಗೆಯಂತೆ ಪವಿತ್ರವಾಗುತ್ತದೆ.

 

                                                                 another Picture

 

ಮಾಘಸ್ನಾನಕ್ಕಾಗಿ ಉತ್ತರ ಭಾರತದ ಪ್ರಯಾಗ, ವಾರಣಾಸಿ, ನೈಮಿಷಾರಣ್ಯ, ಹರಿದ್ವಾರ ಹಾಗೂ ನಾಸಿಕ್‌, ಗುಜರಾತಿನ ಷುಷ್ಕರ ಸರೋವರವು ಮಾಘ ಸ್ನಾನಕ್ಕೆ ಜನಪ್ರಿಯವಾದರೆ, ಕನ್ಯಾಕುಮಾರಿ, ರಾಮೇಶ್ವರಂನಲ್ಲಿ ಪವಿತ್ರಸ್ನಾನ ಮಾಡಿದರೆ ಕೋಟಿ ಪುಣ್ಯ ಬರುವುದೆಂಬ ನಂಬಿಕೆ ಇದೆ. ರಾಜ್ಯದಲ್ಲಿ ಕಾವೇರಿ, ತುಂಗಭದ್ರಾ, ಕೃಷ್ಣಾ ಇತ್ಯಾದಿ ನದಿಗಳಲ್ಲಿ ಸ್ನಾನ ಮಾಡಿದರೂ ಪುಣ್ಯ ಸಂಪಾದಿಸಬಹುದೆಂಬ ನಂಬಿಕೆ ಭಕ್ತರದ್ದು.

ಈ ದಿನಗಳಂದು ಮಾಘ ಸ್ನಾನ ಮಾಡಿದರೆ ಒಳ್ಳೆಯದು...

1. ಪುಷ್ಯ ಹುಣ್ಣಿಮೆ

2. ಮಕರ ಸಂಕ್ರಾಂತಿ
3. ಮೌನಿ ಅಮಾವಾಸ್ಯೆ
4. ವಸಂತ ಪಂಚಮಿ

5. ರಥಸಪ್ತಮಿ
6. ಮಾಘ ಹುಣ್ಣಿಮೆ
7. ಮಹಾ ಶಿವರಾತ್ರಿ

ಮಾಘ ಮಾಸದಲ್ಲಿ ಪ್ರತಿದಿನ ಪವಿತ್ರ ಜಲಮೂಲಗಳಲ್ಲಿ ಸ್ನಾನ ಮಾಡಲು ಆಗದೇ ಇದ್ದಲ್ಲಿ, ಈ ಪ್ರಮುಖ ಮೂರು ದಿನಗಳಲ್ಲಿ ಮಾಡಬಹುದು. ಪ್ರಯಾಗದಲ್ಲಿ ತೀರ್ಥ ಸ್ನಾನ ಮಾಡುವುದರಿಂದ ಸಿಗುವ ಫಲ ಹತ್ತು ಸಾವಿರ ಅಶ್ವಮೇಧ ಯಾಗವನ್ನು ಮಾಡಿದ ಫಲಕ್ಕಿಂತಲೂ ಹೆಚ್ಚು ಎಂದು ಹೇಳಲಾಗುತ್ತದೆ. ಸಾಧ್ಯವಾದರೆ ಮಾಘ ಮಾಸದಲ್ಲಿ ಒಂದು ದಿನವಾದರೂ ಮಾಘ ಸ್ನಾನ ಮಾಡಿದರೆ ಒಳ್ಳೆಯದು. ಮಾಘ ಸ್ನಾನವನ್ನು ಸೂರ್ಯೋದಯಕ್ಕೆ ಮುನ್ನ ಮಾಡಿದರೆ ಒಳ್ಳೆಯದು.

ಅದರಲ್ಲೂ ಬ್ರಾಹ್ಮೀ ಮುಹೂರ್ತ ಅಂದರೆ ನಸುಕಿನ ಜಾವ 3:30 ರಿಂದ 4:00 ರವರೆಗೆ ಸ್ನಾನ ಮಾಡುವುದರಿಂದ ಎಲ್ಲಾ ಪಾಪಗಳು ನಿವಾರಣೆಯಾಗುವುದೆಂದು ಹೇಳಲಾಗುತ್ತದೆ. ಪವಿತ್ರ ಕ್ಷೇತ್ರಗಳಲ್ಲಿ ಸ್ನಾನ ಮಾಡಲು ಸಾಧ್ಯವಾಗದಿದ್ದರೆ ಹತ್ತಿರವಿರುವ ನದಿ, ಸರೋವರ, ಬಾವಿ ಮುಂತಾದ ಯಾವುದೇ ಪ್ರಾಕೃತಿಕ ಜಲಮೂಲಗಳಲ್ಲಿ ಸ್ನಾನ ಮಾಡಬಹುದು..

                                                                      Phalagalu

 
ಮಾಘ ಸ್ನಾನದ ಮಹತ್ವ

ಮಾಘ ಸ್ನಾನದಿಂದ ಆಧ್ಯಾತ್ಮಿಕ ಶಕ್ತಿ ಪ್ರಾಪ್ತಿಯಾಗುವುದರೊಂದಿಗೆ ಆರೋಗ್ಯವಂತ ಶರೀರವನ್ನು ಪಡೆಯಬಹುದು. ಭೌಗೋಳಿಕ ದೃಷ್ಟಿಯಿಂದ ಉತ್ತರ ಪ್ರದೇಶದ ಪ್ರಯಾಗವು ಗಂಗಾ, ಯಮುನಾ ಹಾಗೂ ಗುಪ್ತಗಾಮಿನಿಯಾಗಿರುವ ಸರಸ್ವತಿ ನದಿಯ ಸಂಗಮ ಸ್ಥಾನವಾಗಿರುವುದರಿಂದ, ಮಹಾಭಾರತದ ಅನುಶಾಸನ ಪರ್ವದಲ್ಲಿ ಸೂಚಿಸಿರುವಂತೆ ಯಾರು ಪ್ರಯಾಗ ಸಂಗಮ, ಗೋದಾವರಿ ಹಾಗೂ ಕಾವೇರಿಯಂತಹ ಪವಿತ್ರ ನದಿಗಳಲ್ಲಿ ಸ್ನಾನ ಮಾಡುತ್ತಾರೋ ಅವರು ಪಾಪಗಳಿಂದ ಮುಕ್ತರಾಗುವರು.

 

                                                                            Pic-1

 

ಮಾಘ ಮಾಸದಲ್ಲಿ ಮಾಡುವ ವ್ರತ, ದಾನ ಹಾಗೂ ತಪಸ್ಸಿಗಿಂತ ತೀರ್ಥಸ್ನಾನ ಮಾಡಿದರೆ ಭಗವಾನ್‌ ಮಹಾವಿಷ್ಣುವು ಪ್ರಸನ್ನನಾಗುತ್ತಾನೆ ಎಂದು ಪದ್ಮಪುರಾಣದಲ್ಲಿ ಹೇಳಲಾಗಿದೆ. ಯಾರು ಮಾಘ ಸ್ನಾನ ವ್ರತವನ್ನು ಮಾಡಿ ಶಂಖ, ಚಕ್ರದ ರಂಗೋಲಿ ಬಿಡಿಸಿ ವಿಷ್ಣುವಿಗೆ ಆರ್ಘ್ಯನೀಡಿದರೆ ಯಾವ ಜನ್ಮದಲ್ಲೂ ದಾರಿದ್ರ್ಯ ಬರುವುದಿಲ್ಲವೆಂದು ವಿಷ್ಣು ಪುರಾಣದಲ್ಲಿ ಉಲ್ಲೇಖ ಮಾಡಲಾಗಿದೆ.

ವೈಜ್ಞಾನಿಕವಾಗಿ ಮಾಘ ಮಾಸದ ಮುಂಚಿನ ತಿಂಗಳುಗಳಲ್ಲಿ ಶೀತ ವಾತಾವರಣ ಹಾಗೂ ಮಂಜಿನ ಕಾರಣದಿಂದಾಗಿ ಸಮರ್ಪಕವಾದ ಸೂರ್ಯನ ಶಾಖ ಇರುವುದಿಲ್ಲ. ಇದರಿಂದ ದೇಹವು ದುರ್ಬಲಗೊಳ್ಳುತ್ತದೆ. ಮಾಘ ಮಾಸದಲ್ಲಿ ಸೂರ್ಯನ ಕಿರಣಗಳು ಹೆಚ್ಚು ಶಾಖವನ್ನು ನೀಡುವುದರೊಂದಿಗೆ ನೀರಿನೊಳಗಿರುವ ಬ್ಯಾಕ್ಟೀರಿಯವನ್ನು ನಾಶ ಮಾಡುತ್ತದೆ.

ಸಾಮಾನ್ಯವಾಗಿ ಉಪ್ಪು ಕೂಡಾ ಪ್ರತಿಜೀವಕವಾಗಿ ಕಾರ್ಯನಿರ್ವಹಿಸುತ್ತದೆ ಹಾಗೂ ನಮ್ಮ ದೇಹವನ್ನು, ಚರ್ಮವನ್ನು ಶುದ್ಧೀಕರಿಸುತ್ತದೆ. ಸುಮಾರು 48 ನಿಮಿಷಗಳ ಕಾಲ ಸಮುದ್ರ ಅಥವಾ ನದಿ ನೀರಿನಲ್ಲಿ ಸ್ನಾನ ಮಾಡುವುದರಿಂದ ನಮ್ಮ ಬಾಹ್ಯ ದೇಹವು ನಮ್ಮನ್ನು ಪುನಶ್ಚೇತನಗೊಳಿಸುವುದೆಂದು ಹೇಳಲಾಗುತ್ತದೆ.

 

                                                                             Pic-2

 

 ಮಾಘ ಸ್ನಾನದ ಫಲ:

 

ಮಾಘದಲ್ಲಿ  ಮನೆಯಲ್ಲಿಯೇ ಬಿಸಿನೀರಿನ ಸ್ನಾನಮಾಡಿದರೆ 6 ವರ್ಷ ಸ್ನಾನಮಾಡಿದ ಫಲ ಮನೆಯಿoದ ಹೊರಗೆಹೋಗಿ  ಭಾವಿಯಲ್ಲಿ ಸ್ನಾನಮಾಡಿದರೆ 12ವರ್ಷ ಸ್ನಾನಮಾಡಿದ ಫಲ ಪ್ರಾಪ್ತವಾಗುತ್ತದೆ. ಕೆರೆ ಮೊದಲಾದ  ಮಾನವನಿರ್ಮಿತ ತಟಾಕಗಳಲ್ಲಿ  ಸ್ನಾನಮಾಡಿದರೆ  ಭಾವಿಯಲ್ಲಿ ಸ್ನಾನ ಮಾಡಿದರೆ ಬರುವ ಪುಣ್ಯಕ್ಕಿoತ ದುಪ್ಪಟ್ಟು ಫಲ (24ವರ್ಷ ಸ್ನಾನಫಲ) ಲಭಿಸುತ್ತದೆ. ನದಿಯಲ್ಲಿ ಸ್ನಾನ  ಮಾಡಿದರೆ ನಾಲ್ಕು ಪಟ್ಟು(48 ವರ್ಷ ಸ್ನಾನ ಫಲ) ಪುಣ್ಯಫಲವು ಬರುವುದು ದೇವ ದೇವತೆಗಳು ಸನ್ನಿಹಿತರಾಗಿರುವ ಪುಷ್ಕರಿಣಿಗಳಲ್ಲಿ (ದೇವಖಾತ)ತಟಾಕ.

 

ಉದಾ: ಸ್ವಾಮಿ ಪುಷ್ಕರಣಿ (ಚಂದ್ರಪುಷ್ಕರಣಿ) ಸ್ನಾನವನ್ನುಮಾಡಿದರೇ  ಹತ್ತು ಪಟ್ಟು (120 ವರ್ಷ ಸ್ನಾನಫಲ)ವು, ಗಂಗಾ, ಯಮುನ, ಸರಸ್ವತೀ ಮುoತಾದ ಸಮುದ್ರವನ್ನು  ನೇರವಾಗಿ ಸೇರುವ ಮಹನದಿಗಳಲ್ಲಿ ಸ್ನಾನ ಮಾಡಿದರೆ  100ಪಟ್ಟು  ಪುಣ್ಯಫಲ (1200 ವರ್ಷ ಸ್ನಾನಫಲ) ಮಹಾನದಿಗಳ ಸಂಗಮದಲ್ಲಿ  (ಪ್ರಯಾಗದಿಗಳಲ್ಲಿ)  ಸ್ನಾನ ಮಾಡಿದರೆ  ನಾನೂರು ಪಟ್ಟು (4800ವರ್ಷ ಸ್ನಾನಫಲ)  ಪುಣ್ಯವು ಲಭಿಸುವುದು ಇವೆಲ್ಲವೂ ನದ್ಯಾದಿಗಳಲ್ಲಿ ಸ್ನಾನ ಮಾಡಿದರೆ ಸಹಸ್ರ ಪಟ್ಟು ಪುಣ್ಯಫಲವು  ಲಭಿಸುತ್ತದೆ ಎಂದು ಮಾಘಮಾಸ ಮಹಾತ್ಮೆಯಲ್ಲಿ ಹೇಳಿದೆ.

 

  

-------------------- Hari Om ------------------

    

 

 

 
 

 
 

 

ರಥಸಪ್ತಮಿ -- RathaSaptami

 

ರಥಸಪ್ತಮಿ -- RathaSaptami

 

                                Lord Surya

 

ಸೂರ್ಯನ ಆರಾಧನೆಗೆ ಮೀಸಲಾದ ಅತ್ಯಂತ ಪವಿತ್ರ ದಿನ ‘ರಥಸಪ್ತಮಿ’. ಮಾಘ ಮಾಸದ ಶುಕ್ಲ ಪಕ್ಷದ ಸಪ್ತಮಿಯಂದು ಆಚರಿಸಲಾಗುವ ಈ ಹಬ್ಬದ ಕುರಿತಾದ ಲೇಖನ ಇಲ್ಲಿದೆ: ಭಾರತೀಯ ಸಂಸ್ಕೃತಿಯಲ್ಲಿ ಸೂರ್ಯನನ್ನು ‘ಪ್ರತ್ಯಕ್ಷ ದೈವ’ ಎಂದು ಕರೆಯಲಾಗುತ್ತದೆ. ಸೂರ್ಯನ ಚಲನೆಯಲ್ಲಿನ ಬದಲಾವಣೆ ಮತ್ತು ಆತನ ಜನ್ಮದಿನವನ್ನು ಪ್ರತಿನಿಧಿಸುವ ಹಬ್ಬವೇ ರಥಸಪ್ತಮಿ. ಇದನ್ನು ‘ಮಾಘ ಸಪ್ತಮಿ’ ಅಥವಾ ‘ಸೂರ್ಯ ಜಯಂತಿ’ ಎಂದೂ ಕರೆಯಲಾಗುತ್ತದೆ.

ಹಿಂದೂ ಪಂಚಾಂಗದ ಪ್ರಕಾರ, ಈ ವರ್ಷ 2026ರ ಜನವರಿ 25, ಭಾನುವಾರದಂದು ರಥಸಪ್ತಮಿಯನ್ನು ಆಚರಿಸಲಾಗುತ್ತದೆ. ಭಾನುವಾರವು ಸೂರ್ಯನಿಗೆ ಪ್ರಿಯವಾದ ದಿನವಾದ್ದರಿಂದ ಈ ಬಾರಿ ಈ ಹಬ್ಬಕ್ಕೆ ಮತ್ತಷ್ಟು ವಿಶೇಷತೆ ಬಂದಿದೆ.

                                                                   Ratha Saptami

 

ಹಿನ್ನೆಲೆ ಮತ್ತು ಪುರಾಣದ ಉಲ್ಲೇಖ:

ಸೂರ್ಯನ ಜನ್ಮದಿನ: ಪುರಾಣಗಳ ಪ್ರಕಾರ, ಕಶ್ಯಪ ಮುನಿ ಮತ್ತು ಅದಿತಿ ದಂಪತಿಗೆ ಸೂರ್ಯದೇವನು ಜನಿಸಿದ ದಿನವಿದು. ಜಗತ್ತಿಗೆ ಬೆಳಕು ನೀಡಲು ಸೂರ್ಯನು ಮೊದಲ ಬಾರಿಗೆ ಕಾಣಿಸಿಕೊಂಡಿದ್ದರಿಂದ ಇದನ್ನು ಸೂರ್ಯ ಜಯಂತಿ ಎನ್ನಲಾಗುತ್ತದೆ.

ದಿಕ್ಕು ಬದಲಾವಣೆ: ಉತ್ತರಾಯಣ ಪುಣ್ಯಕಾಲದ ಆರಂಭದ ನಂತರ, ಸೂರ್ಯನು ತನ್ನ ಏಳು ಕುದುರೆಗಳ ರಥವನ್ನು ಉತ್ತರ ದಿಕ್ಕಿನತ್ತ ತಿರುಗಿಸಿ ಸಂಚರಿಸುವ ದಿನವೇ ರಥಸಪ್ತಮಿ. ಈ ಏಳು ಕುದುರೆಗಳು ವಾರದ ಏಳು ದಿನಗಳನ್ನು ಮತ್ತು ರಥದ ಹನ್ನೆರಡು ಚಕ್ರಗಳು ವರ್ಷದ ಹನ್ನೆರಡು ರಾಶಿಗಳನ್ನು ಸಂಕೇತಿಸುತ್ತವೆ.

ಧಾರ್ಮಿಕ ಮತ್ತು ಆರೋಗ್ಯದ ಮಹತ್ವ:

ಆರೋಗ್ಯ ವೃದ್ಧಿ: “ಆರೋಗ್ಯಂ ಭಾಸ್ಕರಾದಿಚ್ಛೇತ್” ಅಂದರೆ ಆರೋಗ್ಯಕ್ಕಾಗಿ ಸೂರ್ಯನನ್ನು ಪ್ರಾರ್ಥಿಸಬೇಕು ಎಂಬ ನಾಣ್ನುಡಿಯಿದೆ. ರಥಸಪ್ತಮಿಯಂದು ಸೂರ್ಯಕಿರಣಗಳು ದೇಹದ ಮೇಲೆ ಬೀಳುವುದರಿಂದ ಚರ್ಮವ್ಯಾಧಿಗಳು ದೂರವಾಗಿ ಚೈತನ್ಯ ಲಭಿಸುತ್ತದೆ.

ಸೂರ್ಯನಮಸ್ಕಾರ: ಈ ದಿನ ಸೂರ್ಯನಮಸ್ಕಾರ ಮಾಡುವುದರಿಂದ ದೈಹಿಕ ಮತ್ತು ಮಾನಸಿಕ ಆರೋಗ್ಯ ಸುಧಾರಿಸುತ್ತದೆ.

 

                                                             Ratha Saptami Greetings

 

ಆಚರಿಸುವ ವಿಧಾನ: (ನಿಯಮಗಳು)

ರಥಸಪ್ತಮಿಯಂದು ವಿಶೇಷವಾಗಿ ‘ಅರ್ಘ್ಯ’ ನೀಡುವುದು ಅತ್ಯಂತ ಮುಖ್ಯ.

ಎಕ್ಕದ ಎಲೆಗಳ ಸ್ನಾನ: ಈ ದಿನ ತಲೆಯ ಮೇಲೆ ಏಳು ಎಕ್ಕದ ಎಲೆಗಳನ್ನು (ತಲೆಯ ಮೇಲೆ ಒಂದು, ಭುಜಗಳ ಮೇಲೆ ಎರಡು, ಮಂಡಿಗಳ ಮೇಲೆ ಎರಡು ಹಾಗೂ ಪಾದಗಳ ಮೇಲೆ ಎರಡು) ಇಟ್ಟುಕೊಂಡು ಸ್ನಾನ ಮಾಡುವುದು ಪದ್ಧತಿ. ಇದು ಶರೀರದ ಕಲ್ಮಶಗಳನ್ನು ಹೋಗಲಾಡಿಸುತ್ತದೆ ಎಂದು ನಂಬಲಾಗಿದೆ.

ಅರ್ಘ್ಯ ಪ್ರದಾನ: ನದಿಯಲ್ಲಿ ಅಥವಾ ಮನೆಯಲ್ಲಿ ಸ್ನಾನದ ನಂತರ ಸೂರ್ಯನಿಗೆ ಅಭಿಮುಖವಾಗಿ ನಿಂತು ಕೆಂಪು ಹೂವು, ಅಕ್ಷತೆ ಮಿಶ್ರಿತ ನೀರನ್ನು ಅರ್ಪಿಸಬೇಕು.

 

                                                                Bathing Mantra

 

ರಂಗೋಲಿ: ಮನೆಯ ಅಂಗಳದಲ್ಲಿ ಸೂರ್ಯನ ರಥದ ರಂಗೋಲಿಯನ್ನು ಹಾಕಿ ಪೂಜಿಸಬೇಕು.
ಪರಮಾನ್ನ (ಹಾಲು ಉಕ್ಕಿಸುವುದು): ಸೂರ್ಯನ ಕಿರಣಗಳು ಬೀಳುವ ಜಾಗದಲ್ಲಿ ಒಲೆ ಹೂಡಿ, ಹಾಲು ಉಕ್ಕಿಸಿ ಅದರಲ್ಲಿ ಹೊಸ ಅಕ್ಕಿಯ ಪಾಯಸ ಅಥವಾ ಪರಮಾನ್ನವನ್ನು ತಯಾರಿಸಿ ಸೂರ್ಯನಿಗೆ ನೈವೇದ್ಯ ಮಾಡಲಾಗುತ್ತದೆ.

ದಾನ ಮತ್ತು ಫಲ:

ಈ ದಿನ ಸಕ್ಕರೆ, ವಸ್ತ್ರ ಮತ್ತು ಗೋಧಿಯನ್ನು ದಾನ ಮಾಡುವುದು ಶ್ರೇಷ್ಠ. ರಥಸಪ್ತಮಿಯ ದಿನ ಮಾಡುವ ಪೂಜೆಯು ಏಳು ಜನ್ಮಗಳ ಪಾಪಗಳನ್ನು ಪರಿಹರಿಸುತ್ತದೆ ಎಂಬ ನಂಬಿಕೆಯಿದೆ.

Lets All Celebrate Ratha Saptami a Great important Festival / Event before the Coming UGADI ( A New Starting Year for All Hindus ).

------------- Hari Om -------------

 

 

 

ಶ್ರೀ ಕೃಷ್ಣನ 108 ಹೆಸರುಗಳು - 108 names of Lord Sri Krishna

 

                                                                     Lord Krishna

 

ಶ್ರೀ ಕೃಷ್ಣನ 108 ಹೆಸರುಗಳು

ಶ್ರೀ ಕೃಷ್ಣನ ಈ 108 ಹೆಸರುಗಳು

These are the108 names of Lord Sri Krishna 

ನಮೋ ವಾಸುದೇವಾಯ

ಕೃಷ್ಣನ ಅನೇಕ ನಾಮಗಳು ಇವೆ. ಅದರಲ್ಲಿಯೂ ಕೃಷ್ಣನ 108 ವಿಶೇಷ ನಾಮಗಳು ಮತ್ತು ಅವುಗಳ ಅರ್ಥಗಳನ್ನು ಕೆಳಗಡೆ ಕೊಡಲಾಗಿದೆ.

There are Many Names of Lord Sri Krishna & among them 108 Selected special names of Lord Krishna and their respective meanings are given below. 

 

                                                           Lord Keshava
 

 

1. ಅಚಲ – ದೃಢಳು

2. ಅಚ್ಯುತ – ದೋಷರಹಿತ

3. ಅದ್ಭುತಃ – ಅದ್ಭುತವಾದದ್ದು

4. ಆದಿದೇವ – ಪ್ರಭುಗಳ ಪ್ರಭು

5. ಆದಿತ್ಯ - ಅದಿತಿಯ ಮಗ

6. ಅಜನ್ಮ – ಹುಟ್ಟದವಳು

7. ಅಜಯ – ಸೋಲಿಸಲಾಗದವನು

8. ಅಕ್ಷರ – ಅವಿನಾಶಿಯಾದದ್ದು

9. ಅಮೃತ - ಅಮರತ್ವವನ್ನು ಒದಗಿಸುವ ಸ್ವರ್ಗೀಯ ಅಮೃತ.

10. ಆನಂದ್-ಸಾಗರ್ - ಆನಂದ ಸಮುದ್ರ

11. ಅನಂತ – ಅಂತ್ಯವಿಲ್ಲದವನು

12. ಅನಂತಜೀತ್ - ಸದಾ ವಿಜಯಶಾಲಿ

13. ಅನನ್ಯಾ - ಶ್ರೇಷ್ಠರಿಲ್ಲದವಳು

14. ಅನಿರುದ್ಧ – ಯಾರಿಂದಲೂ ತಡೆಯಲಾಗದವನು.

15. ಅಪರಾಜಿತ್ – ಸೋಲಿಸಲಾಗದವನು

16. ಅಯುಕ್ತ – ಸ್ಪಷ್ಟವಾಗಿ ಗೋಚರಿಸುವವನು.

17. ಬಾಲಗೋಪಾಲ - ಕೃಷ್ಣನ ಬಾಲ ರೂಪ

18. ಬಾಲಕೃಷ್ಣ - ಕೃಷ್ಣನ ಬಾಲ ರೂಪ

19. ಚತುರ್ಭುಜ - ನಾಲ್ಕು ತೋಳುಗಳನ್ನು ಹೊಂದಿರುವವನು.

20. ದಾನವೇಂದ್ರ - ವರಗಳನ್ನು ಕೊಡುವವನು

21. ದಯಾಳು - ಕರುಣೆಯ ಭಂಡಾರ

22. ದಯಾನಿಧಿ - ಕರುಣಾಳು ದೇವರು

23. ದೇವಾದಿದೇವ - ದೇವರುಗಳ ದೇವರು

24. ದೇವಕಿನಂದನ - ದೇವಕಿಯ ಮಗ

25. ದೇವೇಶ – ಪ್ರಭುಗಳ ಪ್ರಭು

 

 

                                                                           Pic -1

   

26. ಧರ್ಮಾಧ್ಯಕ್ಷ - ಧರ್ಮದ ಪ್ರಭು

27. ದ್ರಾವಿನ್ – ಶತ್ರುಗಳಿಲ್ಲದವನು

28. ದ್ವಾರಕಾಪತಿ - ದ್ವಾರಕಾ ಅಧಿಪತಿ

29. ಗೋಪಾಲ - ಹಸುಗಳನ್ನು ನೋಡಿಕೊಳ್ಳುವವನು

30. ಗೋಪಾಲಪ್ರಿಯ - ಗೋಪಾಲಕರ ಪ್ರೇಮಿ

31. ಗೋವಿಂದ – ಗೋವುಗಳಿಗೆ ಆನಂದ ನೀಡುವವನು; ಇಂದ್ರಿಯಗಳ ಚಟುವಟಿಕೆಗಳನ್ನು ತಿಳಿದಿರುವವನು.

32. ಜ್ಞಾನೇಶ್ವರ - ಜ್ಞಾನದ ದೇವರು.

33. ಹರಿ – ಎಲ್ಲಾ ದುಃಖ ಮತ್ತು ನೋವುಗಳನ್ನು ಹೀರಿಕೊಳ್ಳುವವನು; ಪ್ರಕೃತಿಯ ಪ್ರಭು.

34. ಹಿರಣ್ಯಗರ್ಭ - ಸರ್ವಶಕ್ತ ಸೃಷ್ಟಿಕರ್ತ

35. ಹೃಷೀಕೇಶ – ಇಂದ್ರಿಯಗಳ ಅಧಿಪತಿ

36. ಜಗದ್ಗುರು – ಇಡೀ ವಿಶ್ವದ ಗುರು

37. ಜಗದೀಶ - ಬ್ರಹ್ಮಾಂಡದ ರಕ್ಷಕ

38. ಜಗನ್ನಾಥ - ವಿಶ್ವದ ಪ್ರಭು

39. ಜನಾರ್ದನ – ಅಪರಾಧಿಗಳನ್ನು ಪೀಡಿಸುವವನು; ಭಕ್ತರ ಪ್ರಾರ್ಥನೆಗಳನ್ನು ಪೂರೈಸುವವನು.

40. ಜಯಂತಃ – ನಿತ್ಯ ವಿಜಯಶಾಲಿ

41. ಜ್ಯೋತಿರಾದಿತ್ಯ - ಸೂರ್ಯನ ಪ್ರಕಾಶ

42. ಕಮಲನಾಥ್ - ಲಕ್ಷ್ಮಿ ದೇವಿಯ ಅಧಿಪತಿ

43. ಕಮಲನಯನ – ಕಮಲದ ಆಕಾರದ ಕಣ್ಣುಗಳನ್ನು ಹೊಂದಿರುವವನು.

44. ಕಮ್ಸಾಂತಕ - ಕಮ್ಸನ ಸಂಹಾರಕ

45. ಕಂಜಲೋಚನ - ಕಮಲದ ಕಣ್ಣಿನವನು

46. ​​ಕೇಶವ – ಕೇಶಿ ರಾಕ್ಷಸನನ್ನು ಸಂಹಾರ ಮಾಡಿದವನು; ಉದ್ದವಾದ, ಸುಂದರವಾದ ಕೂದಲನ್ನು ಹೊಂದಿರುವವನು.

47. ಕೃಷ್ಣ – ಸರ್ವ ಆಕರ್ಷಕ; ಕಪ್ಪು ಮೈಬಣ್ಣದವನು.

48. ಲಕ್ಷಿಕಾಂತಂ - ಲಕ್ಷ್ಮಿ ದೇವಿಯ ಅಧಿಪತಿ

49. ಲೋಕಾಧ್ಯಕ್ಷ – ಎಲ್ಲಾ ಲೋಕಗಳ ಪ್ರಭು

50. ಮದನ್ - ಪ್ರೀತಿಯ ದೇವರು

 

                                                         Pic - 2

 

51. ಮಾಧವ - ಲಕ್ಷ್ಮಿಯ ಪತಿ

52. ಮಧುಸೂದನ - ಮಧು ರಾಕ್ಷಸನ ಸಂಹಾರಕ

53. ಮಹೇಂದ್ರ – ಇಂದ್ರನ ಅಧಿಪತಿ

54. ಮನಮೋಹನ್ - ಮನಸ್ಸಿಗೆ ಆಹ್ಲಾದಕರವಾದವನು

55. ಮನೋಹರ್ - ಮನಸ್ಸನ್ನು ಸಂತೋಷಪಡಿಸುವವನು

56. ಮಯೂರ – ನವಿಲು ಗರಿಗಳಿರುವ ಶಿಖರವನ್ನು ಹೊಂದಿರುವ ದೇವರು.

57. ಮೋಹನ್ - ಸರ್ವ ಆಕರ್ಷಕ

58. ಮುರಳಿ - ಕೊಳಲು ನುಡಿಸುವ ದೇವರು

59. ಮುರಳೀಧರ - ಕೊಳಲು ಹಿಡಿದವರು

60. ಮುರಳಿಮನೋಹರ್ – ಕೊಳಲುವಾದನದಿಂದ ಮನಸ್ಸನ್ನು ಸಂತೋಷಪಡಿಸುವವನು.

61. ನಂದಗೋಪಾಲ - ನಂದನ ಮಗ

62. ನಂದಕುಮಾರ - ನಂದನ ಮಗ

63. ನಾರಾಯಣ – ಎಲ್ಲರ ಆಶ್ರಯ

64. ನವನೀತ-ಚೋರ್ - ಬೆಣ್ಣೆಯ ಕಳ್ಳ

65. ನಿರಂಜನ – ಕಳಂಕರಹಿತ

66. ನಿರ್ಗುಣ – ಗುಣಗಳಿಲ್ಲದವನು

67. ಪದ್ಮಹಸ್ತ – ಕಮಲದಂತಿರುವ ಕೈಗಳನ್ನು ಹೊಂದಿರುವವನು.

68. ಪದ್ಮನಾಭ – ಕಮಲದ ಆಕಾರದ ಹೊಕ್ಕುಳನ್ನು ಹೊಂದಿರುವವನು.

69. ಪರಬ್ರಹ್ಮಣ – ಪರಮ ಪರಮ ಸತ್ಯ

70. ಪರಮಾತ್ಮ – ಪರಮಾತ್ಮ

71. ಪರಮಪುರುಷ – ಅತ್ಯುನ್ನತ ವ್ಯಕ್ತಿ

72. ಪಾರ್ಥಸಾರಥಿ - ಪಾರ್ಥನ ಸಾರಥಿ (ಅರ್ಜುನ)

73. ಪ್ರಜಾಪತಿ – ಎಲ್ಲಾ ಜೀವಿಗಳ ಪ್ರಭು

74. ಪುಣ್ಯಃ – ಶುದ್ಧನಾದವನು

75. ಪುರುಷುತ್ತಮ – ಎಲ್ಲಾ ಪುರುಷರಲ್ಲಿ ಶ್ರೇಷ್ಠ; ಸರ್ವೋಚ್ಚ ವ್ಯಕ್ತಿ.

 

                                                                              Pic -3

 

76. ರವಿಲೋಚನ – ಸೂರ್ಯನನ್ನು ತನ್ನ ಕಣ್ಣುಗಳಾಗಿ ಹೊಂದಿರುವವನು.

77. ಸಹಸ್ರಾಕಾಶ – ಸಾವಿರ ಕಣ್ಣುಳ್ಳವನು

78. ಸಹಸ್ರಜಿತ್ – ಸಾವಿರಾರು ಜನರನ್ನು ಜಯಿಸುವವನು.

79. ಸಾಕ್ಷಿ - ಎಲ್ಲದಕ್ಕೂ ಸಾಕ್ಷಿಯಾಗುವವಳು.

80. ಸನಾತನ – ಶಾಶ್ವತ

81. ಸರ್ವಜನ – ಸರ್ವಜ್ಞ

82. ಸರ್ವಪಾಲಕ - ಎಲ್ಲವನ್ನೂ ನಿರ್ವಹಿಸುವವನು

83. ಸರ್ವೇಶ್ವರ – ಎಲ್ಲರ ಪ್ರಭು

84. ಸತ್ಯವಚನ - ಸತ್ಯದ ಸ್ಪೀಕರ್

85. ಸತ್ಯವ್ರತ – ಸತ್ಯಕ್ಕೆ ಸಮರ್ಪಿತನಾದವನು.

86. ಶಾಂತಃ – ಶಾಂತಿಯುತ

87. ಶ್ರೇಷ್ಠ – ಅತ್ಯುನ್ನತವಾದದ್ದು

88. ಶ್ರೀಕಾಂತ – ಸುಂದರ

89. ಶ್ಯಾಮ್ – ಗಾಢವಾದ ಸಂಕೀರ್ಣ ವ್ಯಕ್ತಿ

90. ಶ್ಯಾಮಸುಂದರ್ - ಡಾರ್ಕ್ ಮತ್ತು ಬ್ಯೂಟಿಫುಲ್

91. ಸುಮೇಧ – ಬುದ್ಧಿವಂತ

92. ಸುರೇಶಂ – ದೇವತೆಗಳ ಅಧಿಪತಿ

93. ಸ್ವರ್ಗಪತಿ – ಸ್ವರ್ಗೀಯ ಗ್ರಹಗಳ ಅಧಿಪತಿ.

94. ತ್ರಿವಿಕ್ರಮ – ಮೂರು ಲೋಕಗಳನ್ನು ಗೆದ್ದವನು.

95. ಉಪೇಂದ್ರ - ಇಂದ್ರನ ಸಹೋದರ

96. ವೈಕುಂಠನಾಥ - ವೈಕುಂಠದ ಅಧಿಪತಿ

97. ವಾರ್ಷ್ಣೇಯ - ವೃಷ್ಣಿಯ ವಂಶಸ್ಥ

98. ವಾಸುದೇವ – ವಾಸುದೇವನ ಮಗ

99. ವಿಷ್ಣು – ಸರ್ವವ್ಯಾಪಿ ಭಗವಂತ

100. ವಿಶ್ವದಕ್ಷಿಣಃ – ಅತ್ಯಂತ ಕುಶಲಕರ್ಮಿ

101. ವಿಶ್ವಕರ್ಮ – ಬ್ರಹ್ಮಾಂಡದ ಸೃಷ್ಟಿಕರ್ತ

102. ವಿಶ್ವಮೂರ್ತಿ – ಇಡೀ ವಿಶ್ವದ ರೂಪ

103. ವಿಶ್ವರೂಪ – ಬ್ರಹ್ಮಾಂಡದಂತೆಯೇ ಇರುವವನು.

104. ವಿಶ್ವಾತ್ಮ – ವಿಶ್ವದ ಆತ್ಮ

105. ವೃಷಪರ್ವ - ಧರ್ಮದ ಅಧಿಪತಿ

106. ಯಾದವ - ಯದುವಿನ ವಂಶಸ್ಥ

107. ಯಾದವೇಂದ್ರ – ಯಾದವ ಕುಲದ ರಾಜ

108. ಯೋಗಿನಾಂಪತಿ – ಯೋಗಿಗಳ ಪ್ರಭು

 

 -----------------------------------------------------------------------------------------------------------

------------------------------------------------------------------------------------------------------------ 

                                                              Pic -4

 

ಓಂ ನಮೋ ಭಗವತೇ ವಾಸುದೇವಾಯ

ಕೃಷ್ಣ...ಕೃಷ್ಣ...ಕೃಷ್ಣ

Om Namo Bhagavate Vasudevaya

Krishna...Krishna...Krishna

---------------- Hari Om --------------

 
 

 

ಶ್ರೀ ಪುರಂದರದಾಸರು -- Sri Purandara Dasaru

 

ಶ್ರೀ ಪುರಂದರದಾಸರು -- Sri Purandara Dasaru

 

                                   

                                Sri Purandara Dasaru

ಮನ್ಮನೋಭೀಷ್ಟವರದಂ ಸರ್ವಾಭೀಷ್ಟ ಫಲಪ್ರದಮ್ l

ಪುರಂದರಗುರುಂ ವಂದೇ ದಾಸಶ್ರೇಷ್ಠಮ್ ದಯಾನಿಧಿಮ್ ll

ಹರಿ ದಾಸ ಪರಂಪರೆಯಲ್ಲಿ ೧೩ಶತಮಾನದ ಕೊನೆಯಲ್ಲಿದ್ದ ಶ್ರೀನರಹರಿತೀರ್ಥರು ದಾಸ ಕೂಟದ ಮೂಲಪುರುಷರು. ಆನಂತರ ಶ್ರೀಪಾದರಾಜರು, ಶ್ರೀವ್ಯಾಸರಾಯರು, ಶ್ರೀಪುರಂದರದಾಸರು, ಶ್ರೀಕನಕದಾಸರು, ಶ್ರೀವಿಜಯದಾಸರು, ಶ್ರೀಗೋಪಾಸದಾಸರು, ಶ್ರೀಜಗನ್ನಾಥದಾಸರು ಮೊದಲಾದ ದಾಸಶ್ರೇಷ್ಠರು ಕನ್ನಡನಾಡಿನಲ್ಲಿ ಉದಯಿಸಿ ಜನಸಾಮಾನ್ಯರಲ್ಲಿ ನೀತಿ, ಸದಾಚಾರಗಳನ್ನು ಬೆಳೆಸಿದರು. ಸುಲಭವೂ, ಸರಳವೂ ಆದ ಕೀರ್ತನೆಗಳ ಮೂಲಕ ಭಕ್ತಿ ಹಾಗೂ ಪರಮಾತ್ಮನ ವಿಷಯಗಳನ್ನು ಪ್ರಸಾರಮಾಡಿದರು. ಅಲ್ಲದೇ ತಾವೇ ಸ್ವತಃ ಜನ ಸಾಮಾನ್ಯರ ಮನೆ- ಮನೆಗೆ ಹೋಗಿ ಸರಳ ಕನ್ನಡದಲ್ಲಿ ದೇವರ ನಾಮಗಳನ್ನು ಹಾಡಿ, ಸಂಗೀತ ಹಾಗೂ ಸಾಹಿತ್ಯದ ಮೂಲಕ ಜನಸಾಮಾನ್ಯರ ಮನಸೂರೆಗೊಂಡು, ಅವರ ಉದ್ಧಾರಕಾರ್ಯದಲ್ಲಿ ತೊಡಗಿದರು.

ಈ ದಾಸವರೇಣ್ಯರಲ್ಲಿ ಮೊಟ್ಟಮೊದಲಿಗರೆಂದರೆ ಶ್ರೀಪುರಂದರದಾಸರು. ಪುರಂದರದಾಸರು ಕ್ರಿ.ಶ. ೧೪೮೪ರಲ್ಲಿ ಪುರಂದರಗಡದಲ್ಲಿ ಜನಿಸಿದರು. ಚಿನಿವಾರವೃತ್ತಿಯನ್ನು ಮಾಡುತ್ತಿದ್ದ ವರದಪ್ಪನಾಯಕನ ಮಗನಾಗಿ ಜನಿಸಿದ ಪುರಂದರದಾಸರ ಮೂಲ ಹೆಸರು ಶ್ರೀನಿವಾಸನಾಯಕನೆಂದು. ಶ್ರೀನಿವಾಸನ ದಯದಿಂದ ಜನಿಸಿದ ಶ್ರೀನಿವಾಸನಾಯಕರ ಸ್ವಭಾವ ಅತಿ ಜಿಪುಣತನ. ಶ್ರೀನಿವಾಸನಾಯಕನು ಪುರಂದರದಾಸನಾದದ್ದು ಶ್ರೀನಿವಾಸನಿಂದಲೇ. ಇದಕ್ಕೆ ಕಾರಣಕರ್ತರೆಂದರೆ ನಾಯಕರ ಪತ್ನಿ ಸರಸ್ವತಿಬಾಯಿ.

ಶ್ರೀನಿವಾಸನಾಯಕರ ಗುರುಗಳು ಶ್ರೀ ವ್ಯಾಸರಾಯರು. ಗುರುಗಳಿಂದ ಪುರಂದರ ವಿಠಲ ಎನ್ನುವ ಅಂಕಿತವನ್ನು ಪಡೆದ ದಾಸವೃತ್ತಿಯನ್ನು ಹೊಂದಿದ ದಾಸರು ತಮ್ಮ ಸರ್ವಸ್ವನ್ನು ದಾನ ಮಾಡಿ ಹರಿದಾಸರಾದರು. ಸಂಸಾರ ಬಂಧನದಿಂದ ಹೊರಬಂದು ಬೀದಿ ಬೀದಿಗಳಲ್ಲಿ ಹರಿ ಭಜನೆ ಮಾಡುತ್ತಾ ಸಾಗಿದರು. ಮಕ್ಕಳಿಂದ ವೃದ್ಧವರೆಗೂ ಅವರ ಮನಸ್ಸನ್ನು ಸೂರೆಗೊಂಡ ದಾಸರು ಭಕ್ತಿಯ ಪ್ರವಾಹದಲ್ಲಿ ಅವರನ್ನು ಮುಳುಗಿಸುವುದರ ಮೂಲಕ ಅವರಿಗೆ ಭಗವಂತನ ಸಾನಿಧ್ಯವನ್ನು ಸೇರುವ ದಾರಿಯನ್ನು ತೋರಿಸಿಕೊಟ್ಟರು. ಪುರಂದರವಿಠಲ ಎನ್ನುವ ಅಂಕಿತದೊಡನೆ ದಾಸರು ಸುಮಾರು ೪,೭೫,೦೦೦ ( 4,75,000 Songs Padya, Suladi ) ಪದ, ಪದ್ಯ, ಸುಳಾದಿಗಳನ್ನು ರಚಿಸಿದ್ದಾರೆ.

 

ದಾಸರೆಂದರೆ ಪುರಂದರದಾಸರಯ್ಯ.

ಲೌಕಿಕ ಐಶ್ವರ್ಯ, ಭೋಗಗಳ ನಿಸ್ಸಾರತೆಯನ್ನು ದಾಸರು ತಮ್ಮ ಅನೇಕ ಹಾಡುಗಳಲ್ಲಿ ಪರಿಣಾಮಕಾರಿಯಾಗಿ ಚಿತ್ರಿಸಿದ್ದಾರೆ. ‘ದಾಸರೆಂದರೆ ಪುರಂದರದಾಸರಯ್ಯ‘ ಎಂದು ತಮ್ಮ ಗುರುಗಳಿಂದಲೇ ಪ್ರಶಂಸೆಯನ್ನು ಪಡೆದ ದಾಸರು ‘ಲೊಳಲೊಟ್ಟೆ ಎಲ್ಲಾ ಲೊಳಲೊಟ್ಟೆ, ಆನೆ, ಕುದುರೆ, ಒಂಟೆ ಎಲ್ಲಾ ಲೊಳಲೊಟ್ಟೆ‘ಎಂದೂ, ‘ನೆಚ್ಚದಿರು ಸಂಸಾರ ಸ್ಥಿರವಲ್ಲವೀ ದೇಹ‘ ಎಂದು ಸಾರಿದ್ದಾರೆ.

ಜಗತ್ತು ನಶ್ವರವಾಗುವದರ ಜೊತೆಗೆ ಚಿಂತೆಯ ಬೀಡೂ ಆಗಿದೆ.ಅನುಗಾಲವೂ ಚಿಂತೆ ಜೀವಕ್ಕೆ, ಸತಿಯು ಇದ್ದರೆ ಚಿಂತೆ, ಸತಿಯು ಇಲ್ಲದಿರೆ ಚಿಂತೆ, ಈ ಚಿಂತೆಗಳಿಂದ ಕೂಡಿದ ಇಂತಹ ಜಗತ್ತಿನಲ್ಲಿ ಮನುಷ್ಯರು ಇಂದ್ರಿಯಗಳ ಸೆಳೆತಕ್ಕೆ ಸಿಕ್ಕು ಪರಮಾತ್ಮನನ್ನು ಮರೆಯುತ್ತಾರೆ. ಈ ಸಂಸಾರ ಚಕ್ರದಿಂದ ಬಿಡುಗಡೆ ಹೊಂದುವ ಪ್ರಯತ್ನವನ್ನು ಮಾತ್ರ ಮಾಡುವುದಿಲ್ಲ. ಕ್ಷಣಭಂಗುರವಾದ ದೇಹವನ್ನು ನಂಬಿ, ಅದರ ಅಲಂಕಾರ, ಭೋಗ ಮತ್ತು ಯೋಗ ಕ್ಷೇಮದಲ್ಲಿಯೇ ತನ್ನ ಅಮೂಲ್ಯವಾದ ಆಯುಷ್ಯವನ್ನು ಕಳೆಯುತ್ತಾನೆ. ಅದರ ಬದಲು ಮಾನವನು ತನ್ನ ದೇಹವನ್ನು ಮುಕ್ತಿಯ ಸಾಧನವನ್ನಾಗಿ ಮಾಡಿಕೊಳ್ಳಬೇಕು. ‘ಮಾನವ ಜನ್ಮ ದೊಡ್ಡ ದು | ಇದನು ಹಾನಿ ಮಾಡಲು ಬೇಡಿ ಹುಚ್ಚಪ್ಪಗಳಿರಾ‘ ‘ದಾಳಿ ಬರುವ ಮುನ್ನಾ ಧರ್ಮ ಗಳಿಸಿರೋ||‘ ಎಂದು ಉಪದೇಶಿಸಿದ್ದಾರೆ. ಹಾಗಾದರೆ ಧರ್ಮವನ್ನು ಗಳಿಸುವುದು ಹೇಗೆ? ವ್ಯಕ್ತಿಯ ಉದ್ಧಾರ ಹೇಗೆ? ಎನ್ನುವ ಪ್ರಶ್ನೆ ಬಂದರೆ, ಇದಕ್ಕಾಗಿ ಪರಮಾತ್ಮನನ್ನು ನಂಬಿ, ಎಲ್ಲವನ್ನೂ ಅವನಿಗೆ ಅರ್ಪಿಸಬೇಕು.

 

                                                       Purandara Dasara Idol Carving at Hampi

 

                                                                   Charama Sloka

 

ಆತನನ್ನು ನಂಬಿ ಕೆಟ್ಟವರಿಲ್ಲ ಎಂದು ನಂಬಿರುವ ದಾಸರು ‘ನಂಬಿ ಕೆಟ್ಟವರಿಲ್ಲವೋ ರಂಗಯ್ಯನ ನಂಬದೇ ಕೆಟ್ಟರೆ ಕೆಡಲಿ |‘ ಎಂದು ಹಾಡಿರುವ ದಾಸರು ಈ ನಂಬಿಕೆ ಅಥವಾ ಭಕ್ತಿಯ ಸಾಧನಗಳಲ್ಲಿ ಅತ್ಯಂತ ಮಹತ್ವದ್ದು ಭಗವಂತನ ನಾಮಸ್ಮರಣೆ. ಅದನ್ನು ನಿರಂತರವಾಗಿ ಮಾಡುತ್ತಿರಬೇಕೆಂದು ಈ ಪದ್ಯದಲ್ಲಿ ಹೀಗೆ ತಿಳಿಸುತ್ತಿದ್ದಾರೆ ‘ನರಜನ್ಮ ಬಂದಾಗ ನಾಲಿಗೆ ಇರುವಾಗ ಕೃಷ್ಣಾ ಎನಬಾರದೇ‘ ಎಂದ ದಾಸರು ಪುನಃ ತಮ್ಮ ಒಂದು ಹಾಡಿನಲ್ಲಿ ‘ನಾರಾಯಣ ನಿನ್ನ ನಾಮದ ಸ್ಮರಣೆಯ ಸಾರಾಮೃತವೆನ್ನ ನಾಲಿಗೆಗೆ ಬರಲಿ |‘ ಎಂದಿದ್ದಾರೆ.

ಹಾಗೂ ‘ನೀನ್ಯಾಕೋ ನಿನ್ನ ಹಂಗ್ಯಾಕೋ, ನಿನ್ನ ನಾಮದ ಬಲ ಒಂದಿದ್ದರೆ ಸಾಕೋ |‘ ಎಂದು ಭಗವಂತನ ನಾಮದ ಶ್ರೇಷ್ಠತೆಯನ್ನು ಪ್ರತಿಪಾದಿಸಿದ್ದಾರೆ.

ಇಂತಹ ಹರಿನಾಮ ಸುಧೆಯು ಮನಸ್ಸಿನಲ್ಲಿ ಸದಾ ನೆಲೆಸಿರಬೇಕಾದರೆ ಮನಸ್ಸು ನಿರ್ಮಲ ವಾಗಿರಬೇಕಾದ್ದು ಅತೀ ಅವಶ್ಯ. ಆದಕಾರಣ ದಾಸರು ಕಾಮ, ಕ್ರೋಧಾದಿ ಷಡ್ರಿಪುಗಳನ್ನು ಜಯಿಸುವ ಅವಶ್ಯಕತೆಯನ್ನು ಒತ್ತಿ ಹೇಳಿದ್ದಾರೆ. "ಕಾಗದ ಬಂದಿದೆ" ಎಂಬ ಕೀರ್ತನೆಯಲ್ಲಿ ಕಮಲನಾಭನ ಭಕ್ತರಿಗೆಲ್ಲ ಕಾಗದ ಬಂದಂತೆ ಕಲ್ಪಿಸಿ ಎಲ್ಲರನ್ನೂ ಎಚ್ಚರಿಸಿದ್ದಾರೆ.

ದಾಸರ ಅಭಿಪ್ರಾಯದ ಪ್ರಕಾರ ವೈರಾಗ್ಯವೆಂದರೆ ಮನೆ-ಮಾರು ಬಿಟ್ಟು, ಹೆಂಡತಿ-ಮಕ್ಕಳನ್ನು ತ್ಯಜಿಸಿ ಅಡವಿಗೆ ಹೋಗುವುದಲ್ಲ. ಭಕ್ತನು ಗೃಹಸ್ಥನಾಗಿದ್ದುಕೊಂಡೇ ಮುಕ್ತಿಯ ಮಾರ್ಗವನ್ನು ಹೊಂದಬೇಕು ಎಂದು ತಿಳಿಸಿ ಹೇಳಿದ್ದಾರೆ. ಪ್ರಪಂಚದಲ್ಲಿ ಇದ್ದೂ ಇಲ್ಲದಂತೆ ನಿರ್ಲಿಪ್ತನಾಗಿ ಜೀವಿಸಬೇಕೆಂದು ಉಪದೇಶಿಸುವ ದಾಸರು ಜನತೆಗೆ ಕೇವಲ ನಿವೃತ್ತಿ ಮಾರ್ಗವನ್ನು ಬೋಧಿಸದೇ ಪ್ರವೃತ್ತಿ ಮಾರ್ಗವನ್ನೂ ಬೋಧಿಸಿದ್ದಾರೆ. ಸರ್ವವ್ಯಾಪಿ ಹಾಗೂ ಸರ್ವರಕ್ಷಕನಾದ ಪರಮಾತ್ಮನಲ್ಲಿ ಧೃಡನಂಬಿಕೆ ಇಟ್ಟು ಸಂಸಾರದಲ್ಲಿ ಬರುವ ನಷ್ಟಗಳನ್ನು ಅನುಭವಿಸಬೇಕು.

ಎಂತಹ ಕಷ್ಟಕಾಲದಲ್ಲಿಯೂ ಅಧೈರ್ಯ ಹೊಂದದೇ "ಬಂದದ್ದೆಲ್ಲ ಬರಲಿ ಗೋವಿಂದನ ದಯೆ ಒಂದಿರಲಿ" ಎಂದು ಜೀವನದಲ್ಲಿ ಮುಂದೆ ಸಾಗಬೇಕು. ಈ ಸಂಸಾರವೆಂಬ ಮಹಾಸಾಗರದಲ್ಲಿ ದೊಡ್ಡ ಅಲೆಗಳು ಬಂದಾಗ ‘ಈಸಬೇಕು ಇದ್ದು ಜೈಸಬೇಕು‘ ಎಂದಿದ್ದಾರೆ. ಮತ್ತೊಂದೆಡೆ ‘ಕಲ್ಲಾಗಿ ಇರಬೇಕು ಕಠಿಣ ಭವ ತೊರೆಯೊಳಗೆ, ಬಿಲ್ಲಾಗಿ ಇರಬೇಕು ಬಲ್ಲವರೊಳಗೆ |‘ ಎಂದು ಕಾವ್ಯಮಯವಾಗಿ ಜನತೆಗೆ ದಿವ್ಯ ಸಂದೇಶ ನೀಡಿದ್ದಾರೆ.

ಡಾಂಭಿಕ ಭಕ್ತಿಯನ್ನು ಕಟುವಾಗಿ ಟೀಕಿಸುವ ದಾಸರು ಡಾಂಭಿಕರ ಆತ್ಮವಂಚನೆಯನ್ನು ಕಂಡು ನಗುತ್ತಾ, ಅದನ್ನು ವಿಡಂಬಡಿಸುತ್ತಾ ‘ನಗೆಯು ಬರುತಿದೆ ಎನಗೆ ನಗೆಯು ಬರುತಿದೆ |‘ ಎಂದು ಹಾಡಿ, ಧರ್ಮದ ಬಾಹ್ಯ ಆಚರಣೆಗಿಂತ ಅಂತಃಕರಣ ಶುದ್ಧಿ ಮತ್ತು ಸದಾಚಾರಗಳು ತುಂಬಿರಬೇಕೆಂದು ಸ್ಪಷ್ಟಪಡಿಸಿದ್ದಾರೆ.

 

                                                              Purandara Dasara Moorthy

 

ತಮ್ಮ ಕೀರ್ತನೆಗಳಲ್ಲಿ ಮಧ್ವಮತದ ಸಿದ್ಧಾಂತಗಳನ್ನು ಸುಂದರವಾಗಿ ಪ್ರತಿಪಾದಿಸಿರುವ ದಾಸರು ವಿಶಾಲವಾದ ಮಾನವ ಧರ್ಮವನ್ನು ಸುಂದರವಾಗಿ ಬೋಧಿಸಿದ್ದಾರೆ. ಅತ್ಯುಚ್ಚವಾದ ಪ್ರೀತಿತತ್ವದ, ಅಹಿಂಸಾಧರ್ಮದ ಬೋಧೆಯನ್ನು ಜನಸಾಮಾನ್ಯರಿಗೆ ತಿಳಿಯುವ ರೀತಿಯಲ್ಲಿ ‘ಧರ್ಮವೇ ಜಯವೆಂಬ ದಿವ್ಯಮಂತ್ರ‘ ಎನ್ನುವ ಪದದಲ್ಲಿ ತಿಳಿಸಿದ್ದಾರೆ. ಅಲ್ಲದೇ ‘ವಿಷವಿಕ್ಕಿದವಗೆ ಷಡ್ರಸವನೀಯಲುಬೇಕು | ದ್ವೇಷ ಮಾಡಿದವನ ಪೋಷಿಸಲುಬೇಕು | ಮೋಸ ಮಾಡಿದವನ ಹೆಸರು ಮಗನಿಗಿಡಬೇಕು | ಹುಸಿಯಾಡಿ ಕೆಡಿಸುವವನ ಹಾಡಿ ಹರಸಲುಬೇಕು ||‘ ಎಂದು ಹಾಡಿರುವ ದಾಸರು ದ್ವೇಷಕ್ಕೆ ಪ್ರತಿಯಾಗಿ ಪ್ರೀತಿ, ವಿಷಕ್ಕೆ ಪ್ರತಿಯಾಗಿ ಅಮೃತ ಇವುಗಳನ್ನು ನೀಡುವುದೇ ಉದಾತ್ತವಾದ ಮಾನವ ಧರ್ಮ ಎಂದು ಜನತೆಗೆ ದಿವ್ಯಸಂದೇಶವನ್ನು ನೀಡಿದ್ದಾರೆ.

ಮಾನವ ಜನ್ಮ ದೊಡ್ಡದು, ಇದನು ಹಾನಿ ಮಾಡಲು ಬೇಡಿ, ಹುಚ್ಚಪ್ಪಗಳಿರಾ ||‘ ಎಂದು ಆರಂಭಿಸಿ ಮಾನವ ಜನ್ಮದ ಸಾಫಲ್ಯತೆಯನ್ನು ಪಡೆಯಲು ಈ ನರಜನ್ಮದಿಂದ ಮಾತ್ರ ಸಾಧ್ಯ. ಈ ನರಜನ್ಮದಲ್ಲಿ ಮಾತ್ರ ಸಾಧನೆ ಮಾಡುವುದರ ಮೂಲಕ ಭಗವಂತನ ಸಾನಿಧ್ಯವನ್ನು ಹೊಂದಬಹುದು ಎಂದು ತೋರಿಸಿಕೊಟ್ಟಿದ್ದಾರೆ. ಧರ್ಮ ಜ್ಯೋತಿಯ ಸಂಕೇತ, ಧರ್ಮ ಬೆಳಕಿನ ಸಂಕೇತ, ಧರ್ಮ ಜ್ಞಾನದ ಸಂಕೇತ, ಧರ್ಮ ಉನ್ನತಿಯ ಸಂಕೇತ ಎಂಬುದನ್ನು ಸೂಚ್ಯವಾಗಿ ದಾಸರು ಮನದಟ್ಟು ಮಾಡಿಕೊಟ್ಟಿದ್ದಾರಲ್ಲದೇ ನಮ್ಮ ಸಾಮಾಜಿಕ ಜೀವನದಲ್ಲಿಯ ಲೋಪದೋಷಗಳನ್ನು ಎತ್ತಿ ತೋರಿಸಿ, ಅವುಗಳನ್ನು ಪರಿಹರಿಸುವ ಮಾರ್ಗವನ್ನು ಕೂಡಾ ಸೂಚಿಸಿದ್ದಾರೆ.

ನಮ್ಮ ಮನಸ್ಸಿನಲ್ಲಿಯ ಕಲ್ಮಷಗಳನ್ನು ಹೋಗಲಾಡಿಸಿ, ಶ್ರೀಹರಿಯ ಪಾದವನ್ನು ಸೇರಬಯಸುವ ಪ್ರತಿಯೊಬ್ಬ ವ್ಯಕ್ತಿ ಪರಮಾತ್ಮನ ನಾಮಾಮೃತವನ್ನು ಸವಿಯಬೇಕೆಂದು ಮಾರ್ಮಿಕವಾಗಿ ತಿಳಿಸಿಕೊಟ್ಟಿದ್ದಾರೆ.

ಮನುಷ್ಯನು ಕಾಮ, ಕ್ರೋಧ, ಮದ, ಮತ್ಸರ, ಮೋಹ, ಲೋಭ ಎನ್ನುವ ವೈರಿಗಳನ್ನು ಮೊದಲು ನಿಗ್ರಹಿಸಬೇಕು. ಇದಕ್ಕಾಗಿ ಹಗಲಿರುಳು ಭಗವಂತನ ಧ್ಯಾನವನ್ನು ಮಾಡಬೇಕು. ದೇವರನ್ನು ಕುರಿತು ಚಿಂತಿಸಬೇಕು. ಎನ್ನುವ ದಾಸರು ‘ಸಂಸಾರದಲ್ಲಿ ಈಸಬೇಕು, ಇದ್ದು ಜೈಸಬೇಕು‘ ಎಂದು ನುಡಿದಿದ್ದಾರೆ. ಇದರರ್ಥವೇನೆಂದರೆ ಮರಣವು ನಮ್ಮ ಸಮಸ್ಯೆಗಳಿಗೆ ಉತ್ತರವಲ್ಲ, ಅದನ್ನು ಪರಿಹರಿಸಬೇಕಾದರೆ ಸಂಸಾರ ಸಾಗರದ ಸಿಹಿ-ಕಹಿಗಳನ್ನು ಉಂಡು, ಅವುಗಳನ್ನು ನಿಗ್ರಹಿಸಿಕೊಳ್ಳಬೇಕೆಂದು ನುಡಿದಿದ್ದಾರೆ. ಏಕೆಂದರೆ ಸುಖದ ಸಂತಾನಗಳಾದ ಅಹಂಕಾರ, ವ್ಯಸನ, ಪ್ರತಿಷ್ಠೆಗಳನ್ನು ಮೊದಲು ಬಿಡಬೇಕು. 

 

                                                                     Indian Stamp -1964

 
 

ಏಕೆಂದರೆ ದುಃಖವೇ ಸುಖಕ್ಕೆ ಕಾರಣ. ದುಃಖವನ್ನು ಅನುಭವಿಸಿದವರಿಗೆ ಸುಖದ ಬೆಲೆ ಅರಿವಾಗುವುದು ಎಂಬುದನ್ನು ತೋರಿಸಿಕೊಟ್ಟಿದ್ದಾರೆ. ಅದರಂತೆ ಶ್ರೀಹರಿಯು ಒಡ್ಡಿದ ಅನೇಕ ಪರೀಕ್ಷೆಗಳಿಗೆ ತಮ್ಮನ್ನು ಒಡ್ಡಿಕೊಂಡು, ಅದರಲ್ಲಿ ಗೆದ್ದು ಬಂದಿದ್ದಾರೆ. ಅದನ್ನೇ ಕೀರ್ತನೆಯಲ್ಲಿ ‘ರೊಕ್ಕ ಎರಡಕ್ಕೂ ಕಾರಣ ಕೇಳಕ್ಕಾ||‘ ಎಂದು ನುಡಿದಿದ್ದಾರೆ.

ಹೀಗೆ ಶ್ರೀಹರಿಯನ್ನು ಕೊಂಡಾಡುತ್ತಾ, ಆತನನ್ನು ಸಾಕ್ಷಾತ್ಕರಿಸಿಕೊಂಡು, ಅವನ ದಿವ್ಯಪಾದವನ್ನು ಸೇರಿದ ಪುರಂದರದಾಸರು ನಿಜಕ್ಕೂ ದಾಸಶ್ರೇಷ್ಠರೇ ಸರಿ!

ಇಂತಹ ಅನೇಕ ರೀತಿಯ ಪದ-ಪದ್ಯ-ಸುಳಾದಿಗಳನ್ನು ರಚಿಸಿರುವ ದಾಸರು ನಾರದರ ಅವತಾರವೆಂದು ಹೇಳುತ್ತಾರೆ. ಇಂತಹ ದಾಸಶ್ರೇಷ್ಠರು ಭಗವಂತನ ಒಲುಮೆಗೆ ಪಾತ್ರರಾಗಿ ರಕ್ತಾಕ್ಷಿನಾಮ ಸಂವತ್ಸರದ ಪುಷ್ಯ ಬಹುಳ ಅಮಾವಾಸ್ಯೆ ದಿವಸ ಪರಮಾತ್ಮನ ಪಾದಾರವಿಂದವನ್ನು ಸೇರಿದರು.

ಸಮಸ್ತ ಭಗವದ್ಭಕ್ತರಿಗೆ ಶ್ರೀ ಪುರಂದರ ದಾಸರ ಆರಾಧನಾ ಮಹೋತ್ಸವದ ಶುಭಾಶಯಗಳು.

ಮನ್ಮನೋಭೀಷ್ಟ ವರದಂ ಸರ್ವಾಭೀಷ್ಟ ಫಲಪ್ರದಂ |
ಪುರಂದರ ಗುರಂ ವಂದೇ ದಾಸಶ್ರೇಷ್ಠ ದಯಾ ನಿಧಿಮ್ ||


ದಾಸರಾಯ ಪುರಂದರ ದಾಸರಾಯ ಪ

ದಾಸರಾಯ ಪ್ರತಿವಾಸರದಲಿ ಶ್ರೀನಿವಾಸನ್ನ ತೋರೋ ದಯಾಸಾಂದ್ರ ಅ.ಪ.

ವರದನಾಮಕ ಭೂಸುರನ ಮಡದಿ ಬಸಿರಲಿ ಜನಿಸಿ ಬಂದು ಮೆರೆದೆ ಧರಣಿಯೊಳು 1

ಕುಲಿಶಧರಾಹ್ವಯ ಪೊಳಲೊಳು ಮಡದಿ ಮಕ್ಕಳ ಕೂಡಿ ಸುಖದಿ ಕೆಲ ಕಾಲದಲಿದ್ಯೊ 2

ವ್ಯಾಸರಾಯರಲಿ ಭಾಸುರ ಮಂತ್ರೋಪ
ದೇಶವ ಕೊಂಡು ರಮೇಶನ ಒಲಿಸಿದ್ಯೊ 3

ಮನೆ ಧನ ಧಾನ್ಯ ವಾಹನ ವಸ್ತುಗಳನೆಲ್ಲ
ತೃಣಕೆ ಬಗೆದು ಕೃಷ್ಣಾರ್ಪಣವೆಂದೆ ಬುಧರಿಗೆ 4

 

ಪ್ರಾಕೃತ ಭಾಷೆಯೊಳ್ ನೀ ಕೃತಿ ಪೇಳಿ ಆ
ಪ್ರಾಕೃತ ಹರಿಯಿಂದ ಸ್ವೀಕೃತ ನೀನಾದ್ಯೊ 5

ತೀರ್ಥಕ್ಷೇತ್ರಗಳ ಮೂರ್ತಿ ಮಹಿಮೆಗಳ
ಕೀರ್ತಿಸಿ ಜಗದಿ ಕೃತಾರ್ಥನೆಂದೆನಿಸಿದೆ 6

ಪಾತಕ ವನಧಿ ಪೋತನೆನಿಪ ಜಗ
ನ್ನಾಥ ವಿಠ್ಠಲನ ಸುಪ್ರೀತಿಯಿಂದೊಲಿಸಿದೆ 7 .

 

                                                                             Pic -1

ಪುಷ್ಯ ಬಹುಳ ಅಮಾವಾಸ್ಯೆ ---- ಶ್ರೀ ಪುರಂದರದಾಸರ ಆರಾಧನಾ

ಭಕ್ತಿಸಾಹಿತ್ಯವೆನಿಸಿದ ಕನ್ನಡದ ಹರಿದಾಸಸಾಹಿತ್ಯ ವಾಗ್ಮಯಪ್ರಪಂಚದಲ್ಲಿ ಪ್ರಥಮಸ್ಥಾನವನ್ನಲಂಕರಿಸಿದೆ. ಇಂತಹ ಹರಿದಾಸಸಾಹಿತ್ಯದ ಕೇಂದ್ರಬಿಂದುವಾಗಿ ಧ್ರುವತಾರೆಯಂತೆ ರಾರಾಜಿಸಿದ ಭೂತಾರೆ ಶ್ರೀಪುರಂದರದಾಸರು. ಕೋಟಿ ಕೋಟಿಗೆ ಒಬ್ಬರಾಗಿ, ಲಕ್ಷವರುಷಕ್ಕೊಬ್ಬರಂತೆ ಅವತರಿಸಿ ಬಂದ ಯುಗ ಪುರುಷರಿವರು. ಸಿದ್ಧಾಂತ - ಸಂಸ್ಕೃತಿ - ಸಾಹಿತ್ಯ - ಸಂಗೀತ - ಕಲೆಗಳನ್ನು ಉಳಿಸಿ ಬೆಳೆಸಿದ ಮಹಾನುಭಾವರು. ಪರಂಪರೆಯೇ ದಾಸರನ್ನು ಸ್ತುತಿಸಿ ಹಾಡಿ ಪಾಡಿ ಕೊಂಡಾಡಿ ಕುಣಿದಾಡಿದೆ.

ಶ್ರೀನಿವಾಸನಾಯಕರು ಪುರಂದರದಾಸರಾದದ್ದು ಒಂದು ಪವಾಡ - ದೈವಸಂಕಲ್ಪ. ಇವರ ಜೀವನದ ಪ್ರತಿ ಹಂತವೂ ಉದ್ಭೋದಕ ಹಾಗೂ ನಿದರ್ಶನ. ಮಡದಿ ನೆಪವಾದರೂ ಹರಿಸಿ, ಅವರ ಸರ್ವಸ್ವವನ್ನೂ ಸರ್ವೋತ್ತಮನಿಗೆ ಅರ್ಪಿಸಿದರು. ಮಡದಿ ಮಕ್ಕಳೊಂದಿಗೆ ಭಗವಂತನನ್ನು ಹುಡುಕುತ್ತಾ ಹೊರಟರು. ಶ್ರೀವ್ಯಾಸರಾಜರಂತಹ ಗುರುಗಳ ಅನುಗ್ರಹ, ಶ್ರೀಹರಿಯ ಪರಮಾನುಗ್ರಹ ಇವರಿಗೆ ಶ್ರೀರಕ್ಷೆಯಾಯಿತು. ಪದಪದ್ಯಗಳ ರಚನೆಯ ಜೊತೆಗೆ, ತೀರ್ಥಯಾತ್ರೆ, ಸಾಮಾನ್ಯರೊಂದಿಗೆ ಸ್ಪಂದಿಸಿದರು. ಆಗುಹೋಗುಗಳಿಗೆ, ಸಮಾಜದ ಅಂಕುಡೊಂಕನ್ನು ತಿದ್ದುವಲ್ಲಿ ಯಶಸ್ಸನ್ನು ಕಂಡರು. ಕರ್ನಾಟಕ ಸಂಗೀತವನ್ನು ಆವಿಷ್ಕರಿಸಿ ಪಿತಾಮಹರೆನಿಸಿದರು. 'ದಾಸರೆಂದರೆ ಪುರಂದರದಾಸರಯ್ಯ' ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. 

 

                                                                             Pic - 2

 

ಜೊತೆಗೆ ಇವರ ಕೃತಿಗಳು ಗುರುಗಳಿಂದಲೇ 'ಪುರಂದರೋಪನಿಷತ್' ಎಂದು ಸಾರ್ಥಕ ನಾಮ ಪಡೆಯಿತು. ಕನಸಿನಲಿ ಅಂಕಿತ ಪಡೆದ ದಾಸಾಗ್ರೇಸರರೆನಿಸಿದ ವಿಜಯದಾಸರು ಗುರುಗಳ ಚರಿತ್ರೆಯನ್ನು ಸಂಗ್ರಹಿಸಿರುವರು. ಅಲ್ಲದೆ ಪುರಂದರರ ಕೃತಿಗಳ ಸಂಗ್ರಹಕಾರ್ಯವೂ ಆಯಿತು. ಅಚಲವಾದ ಭಕ್ತಿಹೊಂದಿದ್ದ ವಿಜಯದಾಸರ ಕೆಲ ಮಾತುಗಳನ್ನು ನೋಡುವ ಪ್ರಯತ್ನ -

ಗುರುಪುರಂದರದಾಸರ ನೆರೆನಂಬಲು l
ನಿರುತಕಲಿತು ವಿಜಯವಿಟ್ಠಲ ಒಲಿವ ll ಎಂದರು.

'ಗುರುಪ್ರಸಾದೋ ಬಲವಾನ್ ನ ತಸ್ಮಾದ್ಬಲವತ್ತರಂ' ಎಂದಂತೆ ದಾಸರ ಮಾತು ಹೀಗಿದೆ -

ಏಸು ಬಲವಿದ್ದರೇನು ತನ್ನ ಗುರುಗಳ ಬಲ
ಲೇಸಾಗಿ ಇಲ್ಲದಿರೆ ಒಂದೂ ಫಲವೀಯದು ll

ಆದ್ದರಿಂದ ಗುರುಗಳ ಕರುಣಾಬಲ ಆವಶ್ಯಕ. ಇದನ್ನು ಪಡೆದಿದ್ದ ದಾಸರು ಎಂದ ಮಾತು -
ಏನು ಕರುಣಿಗಳೊ ಎಮ್ಮ ಈ ಗುರುಗಳು l ಎಂದು.

ಇಂದಿಗಾಗುರುಶಿರೋಮಣಿ ಎನ್ನ ದುರಿತದಿಂದ ಸೆಳೆದು
ಪರಮಾರ್ಥರ ಮಾರ್ಗ ಅರಿವು ಮಾಡಿ
ಕರುಣಾಸಾಗರ ನಮ್ಮ ವಿಜಯವಿಟ್ಠಲನ್ನ
ಸ್ಮರಿಸುವುದಕ್ಕೆ ಜ್ಞಾನವನ್ನೆ ತೋರಿದರು ll -ಶ್ರೀವಿಜಯದಾಸರು.

 

                                                                                  Pic - 3

ಶ್ರೀವ್ಯಾಸರಾಜರು ಶಿಷ್ಯರ ಚಟುವಟಿಕೆಗಳನ್ನು ಗಮನಿಸಿ ಮಾಡಿದ ಪರಮಾನುಗ್ರಹ -

ದಾಸರೆಂದರೆ ಪುರಂದರದಾಸರಯ್ಯ l
ವಾಸುದೇವಕೃಷ್ಣನ್ನ ಸೂಸಿ ಪೂಜಿಸುವ ll

ಕಡೆಗೆ ಇವರನ್ನು 'ಪೂತಾತ್ಮ ಪುರಂದರದಾಸರಿವರಯ್ಯ' ಎಂದು ಹಾಡಿ ಪೊಗಳಿದರು.

ವಿಜಯದಾಸರಿಗೆ ತಮ್ಮ ಗುರುಗಳನ್ನು ಎಷ್ಟು ಸ್ತುತಿಸಿದರೂ ಸಾಲದು, ಕಡೆಗೆ -

ಶರಣು ವ್ಯಾಸಮುನಿ ಚರಣಾಬ್ಜ ಭೃಂಗ ಜಯ
ಶರಣು ಜ್ಞಾನ ಭಕುತಿವೈರಾಗ್ಯ ಪರನೆ ಜಯ
ಶರಣು ದಾಸೋತ್ತಮರ ಮಣಿಯೆ
ನಿನಗ್ಯಾರೆಣಿಯೆ ಗುರುಪುರಂದರದಾಸರೆ... ll ಎಂದರು.

ಪ್ರಸನ್ನವೆಂಕಟದಾಸರು ಪುರಂದರದಾಸರನ್ನು ಸ್ಮರಿಸುವರು -

ತಂದೆ ಪುರಂದರದಾಸರ ಸ್ಮರಿಸುವೆ ಎನ್ನ
ಮಂದಮತಿಗಳೆದು ಹರಿಭಟನೆನಿಸುವೆ ll

ಗೀತಠಾಯಿಸುಳಾದ್ಯುಗಾಭೋಗ ಪದಪದ್ಯವ್ರಾತ ಪ್ರಬಂಧ ರಚಿಸಿ ವಿಟ್ಠಲನ l
ಪ್ರೀತಿ ಬಡಿಸಿ ಕಂಡು ನಲಿವ ವೈಷ್ಣವಾಗ್ರನಾಥ ಪ್ರಸನ್ವೆಂಕಟ ಕೃಷ್ಣಪ್ರಿಯನ ll

ಶ್ರೀಜಗನ್ನಾಥದಾಸರು : ದಾಸರಾಯ ಪ್ರತಿವಾಸರದಲ್ಲಿ ಶ್ರೀನಿ
ವಾಸನ್ನ ತೋರೋ ದಯಾಸಾಂದ್ರ ಪುರಂದರ ll

ಶ್ರೀಅಭಿನವಜನಾರ್ದನರು : ಪುರಂದರದಾಸರ ಕರುಣವ ಸಂಪಾದಿಸಿ
ಧರೆಯ ಮೇಲೆ ಚರಿಸಿ ಶ್ರೀಹರಿಯ
ಕರುಣವ ಸಂಪಾದಿಸಿ ಸಿರಿಯ ದೂರನಾಗಿ
ವರಸದ್ಗತಿ ಸೇರುವ ಮನೆಮಾಡೆಲೊ.... l

ಶ್ರೀರಘುಪತಿವಿಟ್ಠಲರು : ಪುರಂದರದಾಸರ ಪಾದ ಪದುಮವ ಕಂಡೆ
ಹರಿದು ಹೋಯಿತು ಎನ್ನನಂತ ಜನುಮದ ಅಘ l

 

                                                                            Pic - 4

  

ಮಹಾವಿಭೂತಿ ಪುರುಷರಾದ ಶ್ರೀಪುರಂದರದಾಸರು ತಾವು ಸಾಧಿಸಿ, ಇತರರನ್ನೂ ತಮ್ಮ ಪಥದತ್

ತ ಸೇರಿಸಿ ಕೋಟಿಕೋಟಿಜನ ಮನಮಂದಿರದಲ್ಲಿದ್ದು ಅನುಗ್ರಹಿಸುತ್ತ ದೈವಕೃಪೆಗೆ 

ಪಾತ್ರರನ್ನಾಗಿಸುತ್ತ ಇರುವ ದಾಸರಿಗೆ ಅನಂತಾನಂತ ನಮನಗಳು.

----------------- Hari Om -----------------